Allenne, die wo isch bisher vunn moim HM-Abendeier verzehlt hab, hawwe ma gerode isch soll schun äh mol vorher in so ähner Meude mitlaafe, diweil in Bärlin 30.000 tausend am Stard sinn, un do gäbs
äh unheumlisches Gedränge.
Isch hab, do wos so eng werd schun äh klänes Probläm. Wenn z.b. ähn Fahrschtuhl gstoppte voll iss, geh isch net noi un ward uff de neckschte.
Moin Therapeud hod, als ma mol do druff zum spresche kumme sinn, soi Aagebraue hochgezoge un gemähnt:
„ Soziophobie – das auch noch „
Awwer des is ä onnerie Gschicht. Die verzehl isch eisch äh oneres mol, awwer a blos vielleischt.
Donn hab isch gelese:
– Liebhaber einer imposanten Kulisse…………
– Im Bad der Läuferwoge….
– Der Flair der Boxengasse…..
– Am 1.11. 18 auf dem Hockenheimring!!
Als se donn noch gemähnt hawwe:
Alle können es noch einmal richtig laufen lassen….
War klar, do geh isch hie. Beim laafe losse, bin isch experde, quasi Profi.
Späder is ma kumme, die mähne des bstimmd onascht. Awwer egal, sgibt a was zum Fuddern un ohgbelich a riese Kuchebar.
Do brauch isch fär den blede Feierdag schunähmol nix eukafe un isch hab misch fär de 5 km Lauf, des schaff isch uff jeden Fall, ohgmeldt.
Schumi gib gumi!
In Hoggene uff de Ring, do wold isch schunn immer mol hi.
Un dä Kracher owwedruff, do soll unser Fabienelle a laafe.
Isch zusamme mid de Deitsche Marathonmeischsterin uff de gleiche Rennstreck – geil.
Isch nemm uff jeden Fall moin Fodo mid …… awwer donn…….
Eier Heuner