Ward ihr schunne mol im Markdhaus? Des is was mid
secend händ, do konscht ginschtisch eukafe. Do gibt’s ah äh Kaffee, do hock isch misch ahmohl gern noi und probier alles mol dursch.
Letscht als isch wieder mol do war seh isch, dass es newe dra ah Bischer gibt.
Jetzd is lese ned moins, awwer gucksscht ähmol, hab isch ma gedenkt.
Isch war escht baff was die do fär äh Ogebot kappt hawwe, un alles super sortiert. Un des werd nach Gromm agerechelt.
Iwwer Laafe war do äh gonzie Lad Bischer. Un do iss ma des Buch vum Dieter Baumann unner die Finger kumme: „Laufen Sie mit!
Der war joh mol Olümpiasieger. Mir vum Stommdisch hawwe den immer de Zahnpaschda-Dieter gehäse. Der soll gedobt hawwe, un des soll in de Zahnpaschda gewese soi. Monn, Monn Monn hawwe mir uns domols des Maul fusselisch diskudiert, ob des iwwer haupt soi konn. Im Dobe, hod jeder gemähnt, kännt er miträdde weil mir uns joh ah ständisch dobe dete. Egal, der is domals gsperrt worre,
awwer er selwer hod immer gschwore er soi unschuldisch.
Isch habs ähm domols geglabt dass er unschuldich issun deshalb hab isch des Buch ah midgenumme. 720 Gramm schwer, un 2,16 €, do konscht net mekkern.
Dehäm hab isch donn gsehe, dass des äh mol äh Gebortsdagsgschenk gewäse is, mid so ner ulkische Widmung: „Manchmal sind Ratschläge und Tipps gut, um zu wissen, dass man alles richtig macht!“
Des Buch war nagelnoi un des Geborddagskind hod wohl kä Tipps gebraucht.
Dofier isch um so dringender! Ihr werds net glawe, awwer isch hab des Buch vun vorne bis hinne gelese, unn fleißisch unerstrische. Jetzd is es ah mol gebraucht, jetzd muss isch nur noch alles rischtisch mache.
Dem Zahnpaschada-Dieter soi Credo is: Lange Läufe, der lockere Dauerlauf ist ideal.
Äh gudi Ausdauer soll de Schlissel fär jedes weidere Vorhabe soi.
Der hod dann so Pläne abgedruckt un hinne im Falss war donn noch so äh Lauftagebuch gstogge. Unbenutzd ibrigens.
Do mach isch misch jetzd driwwer. Bis Bärlin zum HM sins noch 4 Monad, awwer selbscht zum nur Ohkumme soll ma 3 mol die Woch laafe, mindeschtens, un ähmol dofu ähn longer Lauf. Denn hod der Dieter immer Sundags eugedrage. Des gehd bei mir ganett. Do geh isch mit de Kumpels meischdens in die Palz. Do du mer äh bissl wannere und fleisisch eukehre…..
Eier Marathon-Heuner