Beiträge

Veröffentlicht am

De Marathon-Heuner im Oktober 2023

De Marathon-Heuner im Oktober 2023

Kläne Brätscher backe!

Isch hab eisch jo gsagt, dass isch eisch uff dem laufende halde wär.

Allah gud.

Mit moine Vorsorgeunersuchunge bin isch dursch. Irgendwas an moiner Schildrüse iss net gonz in ordnung un jedzd muss isch im Januar nochmal hi un die dun dann gucke ob sisch was veränert hot. Un bis dohi muss isch jeden morge 1 Tablett schlucke. Des is mol was ganz neies far misch, denn bis uff äh paar Schmerztablette, meischtens wenn isch zuviel gsoffe hab, hab isch bisher nie Tablette fresse misse. Awwer  moi Laferei mach isch weider.

Wie schun gsacht. Die Zeide die isch mol geloffe bin konn isch abhoge. Schlussaus, vorbei, finito. Äh Streck, die isch immer mol wieder laf is 7,5 km long. Die bin isch vor 4 Johr um die 45 Minute geloffe. Grad geschtern hab isch`s endlisch gschafft unner 50 Minute zu kumme. Awwer frogt ned, wie ma do die Kuddel rauskonge iss.

Isch hab jedzd ah widder ogfange längere Strecke zu laafe, un uff Aspalt. Dodefier hab isch ma neie Schuh gekaft, die ohgeblisch moi Gewischt besser abfedere und die Knoche schone. Bis jedzd hab isch ned viel gemerkt.

Am liebschte laaf isch am Sunntag. Morgens in aller frieh. Do iss kän Schwanz uff de Gass un isch renn so quer dursch die Stadt. Wenn donn moi App sacht, Heuner du hoscht 5 km geloffe, denk isch ans umkehre. Des iss wie sightseeing, un es kummt ma als so vor als ob die Stadt nur mir gehöre würd. .

Fär Berlin 2024 hab isch misch noch ned ahgemeld. Irgendwie trau isch misch noch ned. Isch bin zum Franklinlauf zum zugugge gange. Ähfach mol wieder Wettkampfluft schnuppere.  Ok, isch wollt ah mol gugge wo isch  lande det. In moiner Altersklass – Ü 70 wär isch 2. awwer ah letschder worre. Isch un moi ego, mir misse jedzd dro arweide, dass ma ah wenn ma ledschder wärd, dann stolz soi konn.

Awwer jedzd ahmol was ernschtes. Mid moim 70. Gebordsdag hods ogfange, dass isch iwwer de Tod nochgedacht hab. Sterbe des war sowas fär alde Leid odder des wo weit weg von mir liegt. Awwer dann korz hinernanner drei Todesfäll, die misch berührt hawwe, un zwä dofu in moim alder un vunn unserer frihere Clique. Donn de nächschte Hammer. Zwä vum Stammdisch. Ähner hod Krebs kriegt, gonz plötzlisch, un de onner hods uff ahmol am Herz. Mir ware alle gschockt. Wenn ma so äh Krebstharapie mid der Chemo un denne Bestrahlunge mohl so Hautnah miterlebt, so vunn Woch zu Woch, des geht ähm gonz schäh an die Niere. Corona überstanne, un donn sowas.

Mir iss klar worre, dass misch so ähn scheiss ah erwische kennt, un isch noch 10 hächstensch 15 Johr hab. Isch sag ma jedzd öfters: Heuner machs Beschde draus.

 

Euer Marathon-Heuner

 

 

 

Veröffentlicht am

De Marathon-Heuner im September 2023

Nochmol dursch startä oder ma fahre uff Berlin

Ma glabts jo ned. Awwer es iss tatsächlisch mehr als 4 Johr her, dass isch im Friehjohr 2019 moin erschte HM geloffe bin.

Isch wills nochmol wisse un nochmol in Berlin laafe. Ma merkts halt doch, dass die alde Knoche nimmer so rescht wolle. Isch will es jedzd nochmol ohgehe, denn wer wes was noch alles kummt. Die Amis wolle jo widder wege Corona die Maskepflicht  euführe. Un mir mache de Amis jo alles noch.

Isch hab misch dursch cheke losse un bis jetzd is alles grad noch im grüne Bereich. Nächschti woch muss isch noch zum Urologe……..

So schnell wie frieher bin isch awwer wahrscheunlich nimmi. Die Berliner hawwe ä drei Stunde limit und dess is machbar.

Isch hab die ledschde zwä Johr gonz viel Rickschläg eustecke misse. Corona, Hexeschuss, äh hardneckische Zohfleisch Endzündung und im Auguscht bin isch bei ähner Radtour dursch de Pälzer Wald gestärzd un hab ma bes des linke Knie uffgschlage un mar äh ausgewachsene Rippeprellung eugfange.

Jezd muss isch gonz longsam widder ofange un alles bleiwe losse was moiner Fitness schade kennt. Des hest: Kän Alkohol mehr, kä Worscht, mehr Gemies un Obst in Menge, awwer sunscht uff Zucker verzischde.

Un nadierlisch alle 2/3  Tag ab in de Wald un Kilomeder robbe. Isch du aisch uff dem laufende halde.

Euer Marathon-Heuner

 

 

Veröffentlicht am

Wie Phönix aus der Asche

 

Allah good, im neie Johr fong isch widder oh zu laafe.

Vunn wege! Pfeifedeckel ! Des hod äfach ned geklappt. Immer is was neies dezwische kumme un isch hab schunn gedenkt isch muss mid dem Laafe gonz uffhere.

Isch hab ma sogar beim Aldi so zwe Stecke, also zum Walken gekafft. Do sehd ihr mol wie verwzeifeld isch war.

Awwer:   alles neu macht der Mai. Isch hab widder ohgfange. Immer nur 5 Km un isch hab ma Strecke rausgsucht, do wo isch ned viel, oder gar ned uff dem bläde Asphalt laafe muss.

Es geht, mehr konn isch noch ned sage. Ziele du isch awwer noch ned ins Visier nämme.

Neulisch beim Stommdisch, als se misch uffgezoge hawwe, warum isch  ned  beim Dämmermarathon midlaafe ded, hab isch gemähnt, isch muss bis nächstesch Johr warde, denn dann bin isch Ü 7O, un du uff dem Treppsche stehe. Des hawwe se ned verstonne. Awwer egal, die schnalle so wie so nix.

Zum Beispiel mit dem Ukraine-Krieg, do hawwe se plötzlich Stress ghabt un rumgejolt, ma muss sisch Vorräte anlegen.

Sind die doch tatsächlisch in die Pfalz niwwer gfahre un hawwe sich jeder 5 Käste Woi, fär de Notfall, gholt.

Apropo Pfalz, dies Johr geht’s beim Dämmermarathon ned niwwer uff die bläd seid vum Rhoi – nach Lumpehafe.

Das die bläd sinn hawwe se wieder gezeigt. Die hawwe dem Veranstalter äh riese Kostereschnung präsentiert. Fär Absperrunge un des gonze Zeig un do hawwe die Monnemer gedenkt,  die Spinne do driwwe, un do mache mas hald nur bei uns hiwwe.

Die Lumpehafener hawwe donn die beleidigte Leberwurscht rausghängt. So sinn se die Pälzer. Immer versuche die onnere iwwer de Tisch ziehe wolle und donn schmolle, wenn die onnere do ned midmache.

 

Euer Heuner.

 

 

 

Veröffentlicht am

2022 geht`s widder los !

 

Isch wollds jo ned glawe, awwer de dokdor hod rescht ghabt. Longsam werds besser un isch du jedzd bloss gehe, also so rumspaziere. So immer um die 5 km rum weil uff moim Arsch konn isch hald ned sitze bleibe. Isch muss immer raus un an die frisch Lufd. Monschmol kumm isch ma vor wie so ähn läffischer Hund.

Good das isch a äh E-Bike hab do fahr isch, ah jedzd wenn`s kald iss, in de Gegend rum. Hauptsach Bewegung un raus. Awwer trotzdem mach ich ma Sorge, isch hab 3 Kilo zugenumme.

Awwer was sinn des far belonglose Sorge. Isch hab eisch doch genau vor ähm Johr vunn moim Kumpel vumm Stommdisch verzählt, dass der Corona kriegt hod. Der war 3 Monad uff de Intensiv un donn noch monatelong in Reha.

Dem geht’s immer noch beschisse un radfahre oder mol ähn längere Spaziergong mache, des konn der nimmi.

An denn muss isch immer denke, wenn Impfgegner dummes Zeig rumproledle odder wie mir sage scheiße babble.

An uns Alde denke die schunn gar ned. Un isch geh schunn gar nimmer groß ford. Un selbscht beim Eukaafe renne se ohne Maske im Gschäfd rum. Un die Midarbeiter zucke mid de Schulder anstatt die naus zu schmeiße.

Isch bin schunn geboostert un isch hoff ihr ah ?

Allah good, im neie Johr fong isch widder oh zu laafe.

 

Euer Heuner.

 

Veröffentlicht am

Isch bin am Asch

Des ledschde mol hab isch eisch gschriwwe, dass beim Franklin die Bodebeläg ned so doll ware.

Jedz is moin linke Fuß, die Sohl, lädiert un isch konn ned rischdisch uffdrede.

Des kummd vunn de Iwwerlasschdung beimlaafe, sage se im Inderned,  un des konn long dauere bis des widder gud iss.

Mol sehe morge geeh  isch zum Doktor   was der sacht.

Plantarfasziitis solls soi. Habt ihr schunn mol dovunn gehärd? Isch jedendalls ned.

Egal wies häst, ma hod tierisch Schmerze un mir reischsts jedenfalls . Bei uns isses jedzd seid Tage neblisch un des basst zu moiner Stimmung.

Dies Johr mähnd de Orthopäde lafft mid lafe nix mehr. Des kännt isch ma abschminke, mähnda.

Allah guud, donn ewe ned.

 

 

Euern Heuner.

Veröffentlicht am

Franklin Halbmarathon geschafft!!!

Franklin Halbmarathon gschafft!!!

Grad so bin isch ned ledschder worre.

Bei  knapp iwwer 200 Starter*inne iss des a käh wunner.

Awwer in moiner Altersklass bin isch 2. worre.

HaHa. Es ware jo ah bloß 2 am Stard.

Zäh hab isch ah widder zusammebeiße misse.

„Angesichts der vielen unterschiedlichen Bodenbeläge auf der Strecke, ist die Siegerzeit beachtlich“, so hästs in de offizielle Pressemitteilung.

Des iss gelinde gsagt schtark unertriwwe. Do ware gonz viel Baustelle durch die mir hawwe durschmisse un do war Schotter. Des is gonz arg uff die Knoche gonge.

Unn grad die ledsche 4 Kilomeder ware  fär misch die Höll. Schotter un donn a noch uff ähm gonz schmale Waldweg iwwer Stock un Stäh. Do hab isch mol rischtisch longsam mache misse weil ab km 17 kumm ich in die Phase, do wo isch kämpfe muss, do wär äh schänie, breidi Stroß, wie  domols beim HM in Berlin, äh super Sach gewese. Do hab isch misch fär  des neue Franklin Baugebiet nimmer interessiert.

Awwer  isch muss schunn sache was do uff dänne friehere Amy-Gelände, durch die ma durchkumme sinn,  abgeht is schun schwer beindruckend. Grad was die Grünanlage betrifft wärre des supper Wohngebiete, wers mol bezahle konn.

Ehrlisch,  die Schtreck war sehr abwechslungsreich, awwer wie gsagt der Bodebelag war nix fär moi alde Knoche. Also Franklin iss domit abgehakt.

Zum Schluss muss isch eisch vun der Ruth verzähle. Also das des die Ruth  war, wäs isch nadierlisch bloß vunn de Stardnummer, weil des do druffgstanne iss.

Die Ruth un isch sinn so ab km 12 bis zum Ziel, mehr oder weniger zusamme geloffe. Die Ruth iss halb so ald wie isch un hod misch immer iwwer hold.

Des war donn so wie beim Katz un Maus Spiel, ähmol sie vorne, donn mol widder isch.

500 Meter vorm Ziel iss se äh stick geloffe, isch hab se iwwerholt un gedenkt isch häd se abgschittelt.  Pfeiffedeckel, vorm Ziel hod se misch wieder abgfonge un isch hab nix mehr druffghabt um mitzuziehe. Do hab isch ma gedenkt: Heuner, Schönheid vor  Alder un  habs ihr vunn Herze gegönnt.

Eier Heuner

 

P.S. Bei dem Lauf ware rund 500 Leid. Do hod de Veranstalder awwer mol gonz  bäs druffgelegt, obwohl se sisch bei de Orga so rischtisch ins Zeig gelegt hawwe. Klasse gemacht.

Veröffentlicht am

Noch 10 Tage

Noch 10 Tage bis zum Franklin Halbmarathon

Moi Credo war immer dursch kumme un bloß ned ledschder wärre.

 

Wenn isch jezd so uff moin aktuelle Träningsstand guck, muss isch ma klar wärre,

dass isch in moiner Altersklass ledschder wär.

Lokal laafe e bloss die hadde un verbissene un do hab isch kä Chance.

Die Freizeidler, so wi isch ähner bin, mache sisch  noch rar. Denne is des Coronagedons zu affisch

oder si hawwe halt ah noch schiss un wenn ma herd das ah geimpfte immer widder erkronge, konn ma des verstehe.

Ledschdi Nacht hab isch gedrähmt, dass de Besewaage hinner mir war……

Awwer isch probiers, ah wenn isch widder die Zäh zusammebeiße muss.

 

Eiern Heuner

Veröffentlicht am

Franklinlauf am 10.10.2021

Jedzd geht’s mol  widder uff die Piste. Nochdem der Dämmermarathon in Monnem zwemol hinnereinanner abgsacht worre is, solls jedzd mid dem Franklinlauf am 10. Oktober 2021 glabbe.

Schau mehr mol.  Was misch awwer total wunnert iss, dass bei denne Läufe, die jedzd widder mit kläner Zahl vunn Teilneehmer stattfinne, Leid sisch ahmelde un donn awwer ned kumme.

Do häst es donn ausgebucht un vunn z.B. 500 laafe dann am Wettkompfdag 350. 

Des iss doch doppelt bläd, odder?

Wer laafe will konn ned un de Veranstalter stehd a bläd do, wenn er die Startgebühre ned vorher kassiert hod.

Also widder mol 21 km vor de Nas. Mir iss äh bissl mulmisch, denn iwwer de summer war isch äh paar mol uff radtour un hab ned so viel Kilomeder in de Bäh wie sunscht.

Also es laaft nimmer so rund. Ob isch nochmol die Zeid vunn Berlin erreisch, glab isch ned.

In Monnem laafe ned so viel in moiner Altersklass un isch hab in de Statistik nochgeguckt unn do konn isch sehe:

Heuner du kenscht ledschder wärre.

Do hab isch jedzd äh bissl dro zu knabbern.

Gruß vum Heuner

Veröffentlicht am

Jedzd geht`s widder los

Isch bin zwemol geimpft. Ruisch sitze konn isch ned.
Die Coronabeschränkungä fascht alle uffghobe worre
also   —  nix wie weg!!  Mid moim Rad.
Mir is  do schun seid longem so ähn Fortz dursch moin Kopp gonge:
Vunn Monnem nach Berlin.
Erinnerd ihr eisch noch WM 2006: Berlin-Berlin-mir fahre nach Berlin.
Des hab isch ma long ned zugedraud.
Awwer seid isch regelmäsisch Laaf, un moim e-Bike, hab isch ma geedengt. Jezad oder nie.
Isch bin awwer in Berlin los, weils grad so billisch mid dem ICE war, un riese Glick,  die weil die Bohn bloß 8 Räder  in ähm Zug midnimmd. Des is ähn run uff die paar Plätz, awwer de Bohn gehd des schoinbar am Arsch vorbei.
Isch habs ned gonz gschafft.
Bis Würzburg bin isch kumme.
650 km in 12 Dag.
Zuletschd hods tierisch wie aus Kiwwel gschid.
Un dass isch misch Quäl kummd gar ned in die Dut.
Isch bin ah immer schäh die Fliess endlong: Havel, Elbe, Saale und am Main.
Was misch awwer gewunnert hod, war, dass so wenisch Radler unnerwegs ware. Kä Problem äh Zimmer zu kriege. Iwwernachd hab isch in Pensione, Privatzimmer, Jugendherberge, awwer ah mol in ähm schnicke Hodel.
Un isch rat jedem mohl durch Brandenburg, Sachsen-Anhalt und Thüringen zu radeln.
Viel Londschaft un in de Därfer un Städte iss ned viel los. Isch hab monschmol gedenkt, do laft alles uff Sparflom, longsomer als bei uns.
Des war komisch, uff de ähne seid ware die Häuser supper renoviert, awwer donn widder stehe Häuser leer un verfalle. Un des noch 30 Johr .
Was tierisch genervt hod iss des Kopfsteinpflaster. Des Hass isch wie die Pest, un wenn des noch nass is, is es teuflisch.
Widder dehäm hab isch misch glei ins Training gschdärdst. Im Oktober  HM beim Franklin-Lauf in Monnem.
Äh bissl mulmisch is mass zwar, awwer widder mol im Rudel laafe is halt ähfach geil.
 
Eier Marathon-Heuner
 
 
 
Veröffentlicht am

Die Hunde un isch

De Marathon-Heuner

Ums glei vorneweg zu sage, isch bin kän Hundehasser!
Misch nerve die nur beim Jogge.
Isch hab ah des Gfiehl es wärre immer mehr. Odder was mähnt ihr?
Seit Corona-Zeide, egal wonn isch laaf, frieh morgens oder owens immer sinn die Kläffer unnerwegs.
Un tatsäschlisch hab isch grad gelese, dass seid der Pondemie mehr Hunde ogschaftt worre sinn.
Do bin isch mol gschpannt was aus dänne alle wärd, wenn im Summer alle widder in de Urlaub fahre. “Oh God, was mach ischn jezd mid däm Vieh. Midnemme konn isch ihn jo ned!!!!”
Awwer do is noch long hi, un bis dohi sinn se an de longe Lein. Kennt der doch, oder? Des Teil wo de “Liebling” an so ähner Schnur laft, die ma meileweid ausziehe konn, damid der Auslauf hod, wenn ma selwer ned hinnerher kummt.
Nur sponne die Schnier immer so quer iwwer moin Laufweg uns
Herrsche is zu bläd odder hod kän bock den Bettvorleger wieder zurück zu angeln.
Isch muss donn als,  wie so ähn Hürdeläufer, driwwer hubbse un Kopf un Krage reskiere. Wenn se ma donn noch ewisch nochlaafe un kä Frausche mehr zu sehe iss, krieg isch ähn Hals.
Ehrlischerweise muss isch zugewähe, dass misch noch käner vunn denne Wadebeiser beläschtigt hod. Iss doch ah schunn wass oder?
 
 
Eier Marathon-Heuner
P.S. Vunn moim Fenschter guk isch uff so äh mini-Grünfläsch. Do lossese ihre Midlebewese hikacke, un monsche losse es donn ähfach ligge. Neilisch hab isch zugeguckt, wie ähner voll in so ähn Haufe neigedrehte iss. Do hab isch lache misse.